雷士照明（02222）董事會內訌進入高潮，嚟緊星期五有好戲睇！話說嗰日雷士會喺深圳舉行LED照明供需大會，但剛剛遇着啱啱，呢日亦係雷士照明現任董事長閻焱回覆經銷商、員工訴求嘅最後限期，到時閻焱會否被「逼宮」？創辦人吳長江又能否成功回巢呢？
事件主角吳長江月初飛咗去倫敦，並且欣賞咗奧運男子100米決賽，仲約咗英國首相卡梅倫一齊食飯，又請幾名員工遠赴英倫歎川菜，星期一晚先飛返中國。唔好睇吳長江咁有閒情逸致，佢上周末連發五篇微博，怒斥「草莽英雄」之說。之後閻焱反譏話吳長江會吸取教訓，由草莽英雄轉向成熟，仲多次提到吳長江涉嫌重慶調查、存在關連交易。吳長江亦都不甘示弱，反駁話「我不告你誹謗不是我心虛，事實終歸是事實」。
有分析話，雷士揀呢個時間召開會議，有兩個目的：一係繼續向閻焱、施耐德「逼宮」，畀吳長江回巢；二係就算吳長江未能回歸，自己都有足夠後路，而經銷商亦都可以立刻啟動新產品嘅推進工作。睇怕，今個星期五吳閻兩位冤家肯定會有一個了斷，絲絲就相當期待喇。