絲絲講場：建行兩元老 傳離巢
自從建行（00939）前董事長郭樹清升官，做咗中證監主席之後，絲絲就發覺其他管理層至今都有更上一層樓嘅迹象，好似財新網引述消息話，建行六個副行長，有兩個會調任，一個去信行（00998）做行長，一個去政策性銀行做監事長。
「老建行」逐漸凋零
話說今次流傳會走嘅，係副行長朱小黃同陳佐夫，兩個都係九十年代就為建行服務嘅「老建行」，聽聞朱小黃會接替信行行長陳小憲，而陳佐夫就好有可能去另一間政策性銀行做監事長。不過，建行發言人就話唔評論市場傳言。
工行背景有着數
其實朱小黃同陳佐夫喺建行分管個人金融同公司業務，一齊調任都幾大件事，亦有意見話，佢哋走咗之後，建行高層變成無乜嫡系老幹部，因為剩番嘅朱洪波同胡哲一都係近年先入建行，而趙歡同龐秀生就係近年內部新進高層。
傳言話，建行兩個副行長空缺，好大可能係內部晉升同外部聘任各一個，而內部呼聲最大就係建行黨委委員章更生，至於外部聘請就認真難估，不過如果又要喺國有銀行度調任，咪即係又有內銀音樂椅玩？
絲絲記得依家建行董事長王洪章同行長張建國都有少少工行（01398）背景，監事長張福榮之前更係工行副行長，可能有工行背景嘅高層要入建行會易啲，話晒大家業務同規模都叮噹馬頭。
余詩韻