MARKET INSIGHT：零售股 貴得有道理

十一月美國總統大選前，是否要拉上助選之嫌去提早放水，機會只係五五波，心口掛個勇字的務必要考慮相關風險。

尋日提過德國股神科斯托蘭尼，以狗主與狗散步比喻，股市同經濟長期同步，短期卻可各走各路，啱啱好形容今日市況，眾央行在救市措施上，仲係「見身郁唔見米白」，但揸重淡倉嘅基金經理已經要驚定先，八個交易日恒指挾高近千二點，沽空佔大市成交明顯縮水，得兩日超過一成，升市動力主要來自沽空冚倉，如果過多幾日仲係未有下文，得來不易的兩萬點隨時掉番出街。

放大圖片

放大圖片

渣打債收息諗得過

恒指尋日升73點報20,072點，連續兩日壓住響21,385至18,056點跌浪的0.618反彈阻力20,113點樓下收市，技術上，最好等破位才確認大市轉勢。渣打（02888）被美國紐約州金融局指控洗黑錢，股價一度跌至149元，落返去年十月上升裂口，收報160.1元跌28元。

渣打最終會否被罰款甚至被吊銷紐約州經營牌照？業績又會唔會因罰款需要提撥？在下無預知未來水晶球，但尋日一跌，股價由吸引變成非常吸引，只可惜事件影響投行對股票評價，卻又未至於令評級機構降級，幾隻Perpetual bonds尋日都見回吐，如果未來幾日債息重返8厘樓上，好息一族，可以諗吓沽番多少近日升幅唔細的REITs，轉買渣打債收息。

西班牙時裝品牌Zara，早前以天價千一萬月租，承接H&M旗艦店原址，較後者舊租約出多一倍搶舖。今時今日，訪港同胞勒住荷包，Zara夠膽逆市拓店，唔少同行早已嘩聲四起。

Zara點石成金威力，睇思捷（00330）尋日急升可見一清二楚，公司只係簽下前Zara分銷及營運總監Jose Manuel Martinez Gutierrez為新任執行董事及集團行政總裁，工都未返，股價已狂升見13.8元，同前日收市9.97元比較，一日市值多50億元，份合同只係300萬歐元（2,887萬港元）年薪加花紅，即使未算一本萬利，一賠一百七十三倍大冷門，已經順利跑出。

普拉達（01913）上半年營運數據，營業額15.478億歐元，大升36.5%，當中零售佔總額80.6%，按年升47.2%，批發則升4.8%，直營店同店銷售，增長19%，幾個數字都高於分析員預測數字，另一值得嘉許的，是各地區業務增長十分平均，意大利升21.7%，意大利以外的歐洲升37.3%，亞太區升45%，美洲升31%，日本升34.2%，營運指引上，很難找到可以挑剔的地方。

老實講，預期市盈率26.3倍PE的普拉達真係唔平，比起部分知名歐洲品牌，如17.8倍的LVMH，18.5倍的Burberry，16.2倍的Tod's都貴，估值同Hermes及Salvatore Ferragamo睇齊。不過，八月業績期殺到，發盈警公司破晒紀錄，為怕誤踩陷阱，大孖沙買貨格外小心，一係等成績表曝光至買，或者押落去業績無死的股票，尋日股價創新高，普拉達顯然屬後者。

金飾股難復去年勇

今年以來全球魚缸市值大蒸發，唔少富豪身家大縮水，海內外大款購物消費豪情收斂，故見奢侈品股好景不再，好似三隻金飾珠寶股——周大福（01929）、六福（00590）同周生生（00116），股價迭創52周低，現時52周低位較52周高位下跌四成至六成不等。

如今第三季經已差唔多過咗一半，市場憧憬各國推出新一輪刺激經濟方案，游資翻兜低殘股，尋日見英皇鐘錶（00887）升7%、周大福及六福分別升4%及2.5%。但古勝就認為，由於去年嘅比較基數較高，今年下半年行業銷售即使可以止跌回穩，亦幾可肯定難復去年勇，料板塊會喺低位徘徊一段時間，股價有波幅冇升幅，故跟炒宜嚴限注碼，且緊守止蝕位。

古勝