絲絲講場：李文俊住喺廠證明安全
最近日本王子造紙廠喺中國江蘇啟東嘅排污渠項目，因為遇到當地居民抗議，搞到要停工，事件仲餘波未了，內地紙業「二哥」理文造紙（02314）尋日開股東會，絲絲就趁呢個機會捉住理紙CEO李文俊（Raymond）傾吓，睇吓佢擔唔擔心遇到類似情況。
理文一向做好環保
Raymond就話，理文喺環保方面一向做得好好，所以一啲都唔驚，仲話隨時歡迎有關當局去睇，而佢更加話，佢自己都住喺間廠入面，有咩事第一個死嘅係佢，唔似其他人咁「間廠就喺度，佢就住喺第二度」，所以可以保證係絕對冇問題，仲叫絲絲得閒可以上去參觀吓添！
咦！Raymond咁講似乎係對王子踩多兩腳，暗寸佢哋人就喺日本，但啲廠就喺中國，諗住眼不見為乾淨喎！不過，今時今日有豪宅唔住，同員工一齊住廠嘅老細真係唔多，唔怪得理文盤生意逆市都做得唔錯！
余詩韻