絲絲講場:中誠信挑戰評級巨頭

絲絲尋日出席中誠信子公司中誠信(亞太)嘅揭牌儀式,可謂星光熠熠,除咗請嚟香港證監會主席做主禮嘉賓外,仲有港交所(00388)CEO李小加致詞,祝賀首家中資評級機構獲國際認可,係人民幣走向國際化嘅重大里程碑。

中誠信創辦人兼董事長毛振華話,目前國際評級業務畀兩大美資機構穆迪同埋標普壟斷,但係佢哋對發展中國家嘅國情並唔了解,即使質素相對良好嘅債券都被評為垃圾級別,所以市場上極需要了解中國人民幣債券交易嘅評級機構,等發債人同埋投資者多一個選擇。

不過佢哋亦都承認,評級呢個行業唔係純粹科學,極需要透過經驗學習,所以預計頭兩年都係投資期,即係只作耕耘,不問收穫咁解,務求先盡快建立國際認受性,長遠目標就當然希望同兩大機構爭奪國際市場嘅份額啦。

毛振華商學兼優

絲絲仲收到風,毛總除咗做生意了得,以廿八歲之齡就創辦公司之外,學術上亦有相當大嘅成就,先喺武漢大學攻讀博士學位,繼而擔任人民大學經濟研究所所長,亦曾經喺國家經濟單位從事研究工作。佢當年矢志要建立中國嘅穆迪,結果喺○六年中誠信正正就係獲得穆迪入股,稱得上喺行內嘅傳奇。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!