絲絲講場:恒生李慧敏緊貼衣食住行

由滙豐空降到恒生(00011)嘅李慧敏(Rose),出任恒生副董事長兼行政總裁至今大約兩個月時間。佢日前出席中期業績會嘅時候,較少談及個人感受,尋日會見傳媒時,就同記者分享咗轉職之後嘅有趣體會。

Rose話,佢以前喺滙豐嘅環球銀行資本市場部門工作,較專注香港同內地嘅大型企業客戶,例如係幫國企做收購合併、融資方面嘅財務顧問之類。

掌握經濟脈搏覺新鮮

轉到恒生銀行之後,較多接觸各行各業嘅中、小型企業。恒生係本土銀行,Rose話佢依家嘅工作同香港社會嘅實體經濟,即係衣食住行息息相關,例如做按揭業務幫人買樓,而講到信用卡消費時,Rose就話最近打工仔加咗人工,銀行亦見到消費額增加,可以直接掌握香港經濟脈搏,「對我嚟講好新鮮﹗」

席上傳媒又多次追問Rose,會唔會喺恒生內部培養接班人,佢就強調會向住呢個目標努力,又笑住咁話:「我只係接任兩個月啫,畀多少少時間我先啦﹗」

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!