雅虎（Yahoo）早前任命跳槽去佢哋度嘅前谷歌（Google）全球營運副總裁邁耶（Marissa Mayer）出任行政總裁，外界都期望呢位曾有「Google第一美女」之稱嘅雅虎新帥，會為雅虎帶嚟新氣象。而佢上任後為雅虎引入嘅首項新政，既唔係裁員減薪，亦唔係放售業務追求短期盈利，而係為雅虎一眾員工，提供免費午餐優惠！
講真，絲絲都知道呢種免費午餐安排，對美國矽谷嘅科網企業嚟講，本來唔算有乜特別，而邁耶嘅老東家谷歌更一直將呢類「小恩小惠」視為公司嘅傳統福利之一，邁耶此舉雖然有向舊公司偷橋之嫌，但對於士氣本身唔多好嘅雅虎嚟講，此舉就有提振軍心嘅作用。邁耶亦同時為雅虎引入周五下午舉行員工全體聚會嘅制度，據講佢仲計劃幫雅虎辦公室大執位，一於要喺雅虎重新建立團隊文化，為往後嘅改革以至新嘅潛在收購鋪路。
邁耶被視為係雅虎起死回生嘅希望，但隨住佢嘅上任，雅虎早前臨危授命嘅臨時行政總裁Ross Levinsohn亦靜悄悄咁，喺尋日（31日）離開雅虎。Ross哥哥係湯普森（Scott Thompson）年初因學歷造假辭任雅虎行政總裁後，被委任為臨時行政總裁嘅，誰知佢只係臨記一名，真命天女邁耶獲委任差不多兩周後，Ross就遞信走人，唔通靚女真係着數啲。