Market Insight:東風跟大戶上車

全球憧憬歐美英央行不日放水,唯獨A股完全沾不到半點樂觀氣氛,滬綜指昨日險守2,100點,跌住收市,調查機構訪問內地基金持倉,顯示持貨比例跌至不足八成,套用揸5%現金算睇淡的「國際慣例」,內地芬佬對股市前景,同二○一二年將會世界末日無乜分別。

股神巴菲特話人家貪婪你要小心,人人小心要學懂貪婪。古勝認識的內地基金,的確有清一色睇淡的傾向,經驗告訴當沽家已經「傾囊出售」,內地股市或者真的接近短期低位。瑞銀以「山窮水盡疑無路」為題,建議開始睇番A股,預測年底滬綜指重上2,600點。

瑞銀所持的主要理由是下半年內地市場機會比上半年大,第四季又比第三季好,內地企業毛利率改善拐點預期會在第四季出現,尤其第三季物價下跌,加速企業降低庫存,展望物價第四季開始穩定,連跌多季之企業毛利率也將觸底,能夠受惠於成本下降的板塊包括航空、電力、家電、汽車、紡織服裝及水泥等。且看這批股份能否柳暗花明。但其實古勝兩個月前已建議要買番業績由紅變黑的電力股,近期汽車股沽空明顯收斂,低位見收集,開始有留意必要。

出口市場大有潛力

東風集團(00489)旗下A股公司早前發盈警,大好友高盛護航,強調A股與H股並非一間公司,東風純粹揸三成股權,去年佔總收益不到2%,影響微乎其微,但市況咁差又見盈警兩個字,真係有理說不清,東風股價級級落,最後都陰陰乾試穿10元。

客觀環境,內地車廠經過幾年擴產高峰期,未來三至五年在競爭加劇之下,毛利率壓力會逐漸浮現,但見近排分析員對內地汽車行業有另一睇法,一是零部件成本效益提升,原材料價格高位回落得到紓緩,其次是國產汽車出口的故事。中國貴為全球汽車產銷大國,可是論生產同出口比例,低得可憐,去年僅3%國產汽車出口,同南韓近68%產品出口輸十幾條街,連俄羅斯汽車都比中國高,有5.8%。有分析員預期,未來幾年內地車廠重點是推動出口,估計年增長會達兩成五到三成,東風身為內地合營車廠龍頭,坐擁先天優勢,近兩日大成交做好,初見芬佬入貨手影,應可放心擺落購買名單之中。

造船業未有耐復甦

內地最大民營造船廠熔盛重工(01101)的大股東張志熔捲入美國的內幕交易調查,醜聞配合盈警的消息,兩日之內股價由1.4元跌至1.07元收市,市值縮水得番75億元。20個月前,公司才以每股8元上市,集資107億元,今日八碗水煮埋一碗,當日認購的股民認真杰撻撻!昨日德銀以內地造船業惡化,新合約大減為由,目標價降至7毫子,先不談市場對民企信心早已盡失,睇見老牌船廠廣船(00317),股價同樣低處未算低,管治危機外,同時反映造船業客觀環境並唔理想的事實。

行業盛衰周期中,造船企業往往站得最後,至少船運公司租用率明顯回升,公司方會訂新船擴充船隊。早前和海運公司高管傾開,近半年歐美航線一池死水,內地出口放緩,加上採購油、煤等天然資源胃納細咗,閒置船愈來愈多,造船業最壞時刻恐怕未過,要火中取栗博反彈,真係要諗清諗楚。

昨日升市,除咗重磅股做好外,部分近期股價跌到一仆一碌嘅民企股亦都乘機大舉反撲,其中國美(00493)以及霸王(01338)分別升10%及17%,惟相對呢三個月嘅累計跌幅,彈幅唔夠買膠布!另外,跌勢較急嘅則有達進東方照明(00515)同利君(02005),跌幅分別達兩成及一成。

QR碼一嘟查派息

顯然,如今魚缸處處「地雷」,醜股跌完可以再跌,如墮無底深潭;強勢股轉弱嘅速度亦同樣驚人,近期廣藥(00874)同利君嘅表現都係典型例子。論醜股,內傷復原需時,博反彈隨時因小失大;至於強勢股,累升幅度太多,一旦基金沽貨離場跌勢可以遠超預期,都係兩睇。與其要博,倒不如(目及)實估值超低迷嘅鋼鐵同煤炭板塊,在國策支持下,年底前觸底在望,中線可逢低收集。

在業績期內,上市公司排隊派成績表,對投資者來說,公司盤數做得靚唔靚,當然緊要,但點都及唔上派息咁重要。依家智能手機大行其道,加上QR碼應用上愈嚟愈方便,想知道自己揸住隻股票有冇息派,用手機嘟一嘟《東方產經》行情版的「派息及沽空資料」QR碼,立即有得睇。

古勝

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!