最近國際互聯網調查機構Gartner公布今年第二季全球PC銷量，冠軍仍然係惠普，呢季全球PC出貨量達到8,750萬台，惠普就佔咗其中嘅14.9%，雖然今年連續兩季都係第一，但係聯想呢季已經追到上第二位，市佔率達14.7%，同惠普比較，僅落後0.2%。對於由e-Bay轉過嚟嘅惠普新任CEO惠特曼嚟講，呢趟真係感受到空前壓力！
絲絲記得惠特曼係舊年九月先至轉嚟惠普，代替被炒嘅前CEO李艾科。惠普喺今年就迅速重上PC銷售第一，可見惠特曼嘅功力。咁今次面對嚟自中國嘅聯想挑戰，惠特曼又有乜計仔去迎戰？
原來，惠特曼嘅策略，就係攻打聯想嘅中國大本營，根據日前惠普嘅內部電郵，惠普全球副總裁兼中國惠普IPG總裁錢越已離職，本來人事變遷乃司空見慣嘅事，但接管職位嘅係剛上任不久、曾經任職聯想港台韓區域總經理嘅倪曉輝，咁就大有文章囉。
有惠普內部員工就話，倪曉輝以前就係聯想中國負責銷售渠道嘅要員，依家請佢嚟惠普就擺明想係以華制華啦。