絲絲最近喺國際政治新聞睇到，盛傳太平洋投資管理（PIMCO）行政總裁埃利安會出任埃及下屆總理。莫非埃利安想撈過界，食埋政治呢行飯？
事緣有份沙特阿拉伯報章爆料，話埃及影響力最大嘅政黨自由正義黨（Freedom and Justice Party）考慮由埃利安出任下屆埃及總理。埃及投資銀行Beltone Financial研究主任Angus Blair大讚埃利安既熟悉經濟又有營商經驗，對埃及經濟絕對起到正面作用。消息一傳出，即時謠言滿天飛。
不過當事人埃利安就斬釘截鐵，講到明話自己無意做下屆埃及總理，連佢自己都唔知個謠言喺邊傳出嚟。佢仲好謙咁話大家太抬舉佢喇，總理寶座應該交畀經歷過埃及民主革命嘅人。
雖然埃利安望落去的確有幾分中東人嘅味道，亦有為阿拉伯之春發表過意見，但絲絲相信呢鋪都係亂傳。
而且，就算埃及政黨真係有意搵埃利安，恐怕係神女有心，襄王無夢，埃利安暫時都未想踩過界，仲要踩到埃及政界咁遠。