以前買去Ball靚衫，精明嘅中環上班族會揀畢打行嘅樓上舖，依家就變晒樣，得番啲畫廊，好似去咗荷里活道咁，當中有幾間畫廊仲係國際知名。畫廊唔同博物館，後者有政府支持，但前者就需要賺錢去生存，點解佢哋會揀中環開舖，而又要聚埋一齊呢？
金占士有幸，舊年獲邀出席曾梵志老師畫展開幕酒會，畫展嘅地點就係喺畢打行入面某間來自紐約嘅畫廊。
除咗英文，聽到普通話多過廣東話，當中好多係有心買畫嘅人。但點解要揀香港睇貨同交易呢？北京798藝術區、上海M50創意園都係國際聞名嘅畫廊集中地喎。
原因係香港仲有兩項相對優勢，其一係香港貨品自由出入，大陸就要打稅、要申請，外國嘅賣家都為免麻煩，喺香港交收乾手淨腳，而且香港匯率穩定，匯錢走又方便，點樣將畫運返大陸就買家自理。好似曾老師嘅畫咁，早年賣咗好多幅去外國，依家要藉香港回流，真係別有一番滋味。
其二係好多內地人都怕喺大陸買到假貨，所以嚟香港買，因為有中介人做盡職調查，集齊過往嘅買賣紀錄，加埋證書證明真假，可以話係信心嘅保證。
金占士