絲絲講場：現代教育北上搞電子書
內地實行一孩政策多年，相信大家都理解到父母「望子成龍」嘅心態愈來愈重，所以喺香港搞補習社多年嘅現代教育（01082）主席吳錦倫（Ken Sir）當然深明此道，佢一早已經話內地發展潛力好大，可惜受到各種牌照問題困擾，令佢遲遲未能大展拳腳。
期望10萬間小學採用
不過，呢個困擾似乎有解決辦法喇！尋日現代教育同深圳新聞出版局及深圳對外貿易發展局旗下嘅深圳市益文圖書簽訂合作協議，主要係共同發展電子書及青少年培訓班業務。Ken Sir話期望未來內地有超過10萬間小學採用公司嘅電子書，但係對於合作嘅投資額就唔想多講，只係強調內地教育前景好，相信係一項好值得投資嘅業務咁話。
現代教育舊年7月先上市，但股價似乎就唔多「爭氣」，至今累積跌超過六成，令到Ken Sir身家都唔見咗一大截，所以睇來Ken Sir喺呢方面都要諗吓計仔喇！