金融大鱷索羅斯駐港四大元老之一嘅蔡篤昀，先排傳出拉隊走人，絲絲就搵到美國索羅斯基金總部回應，話佢仲係公司僱員！而絲絲就聽到索羅斯基金會保留本港業務，但蔡生就畀人斟緊過檔。
索羅斯基金發言人Michael Vachon同絲絲講，Robert Tsai（蔡篤昀洋名）仲係公司僱員嚟o架，其他嘢就唔願多講。確實，證監會登記顯示，Robert自○五年三月二十三日起，登記係索羅斯在港基金公司SFM HK Management僱員，目前都無變動。
不過Robert過檔消息就傳之不絕，上個月有人話佢同負責團隊都離任，仲將佢主理嘅10億美元投資組合平倉。
有基金朋友就爆料畀絲絲聽，其實索老無待薄過呢班香港大員，無減薪又無裁員，只係無咩嘢大搞作，搞到坐盤嘅Robert自己無咩癮，據聞台灣嘅金融集團「金控」就傾緊Robert自組投資公司，專責中港及大中華區，所有決定由佢打骰，Robert係台灣人，自然好有機會成事。
至於索老，近年喺香港無咩驚天動地嘅嘢做過，又不斷傳佢嘅香港團隊有人離巢，懷疑佢會唔會撤出香港，絲絲就八到SFM無呢個打算，其實佢一直等緊機會，可惜近年祖國強大，又一直撐住香港經濟同股市，令索老無可乘之機，據聞反而增加咗南美同俄羅斯嘅資源，因為大波幅市場先至係對沖基金嘅樂園。
余詩韻