MARKET INSIGHT：創科重組效益顯現

股市有水放水，偷步炒QE3的港股行三步退兩步，昨日恒指下跌215點，收報19,239點，主板成交和周二相若，可是沽空佔比由9.2%回升至11.3%，反映淡友相對稍為積極。昨日個市特色係跌勢全面，煤炭、電訊設備、水泥統統無運行，古勝特別一提，近期明顯反彈動力減弱的內房股，昨日國統局公布六月份，70大、中城市新建商品住宅價格，按月有25個升，21個跌，24個持平，人行連環放水開始起到推波助瀾作用，國統局在數據公布後，特別強調目前調控成果未夠穩固，措施唔可以放鬆。

基金一句唔該，借嚟作為獲利回吐理由，華潤置地（01109）及中國海外（00688）分別跌5.9%及4%，攜手成為藍籌表現最差股份。內房股捧場客，未來幾個月睇住國統局數據，最好係量升價唔升，以免觸動十八大之前，令中央壓抑樓價決心再度高漲。

放大圖片

放大圖片

美樓市似現小陽春

近兩三個月，美國新屋銷售數據都比市場預期好，經歷五年調整，按揭息率剛創歷史新低，美國樓市有迹象出現小陽春，亦直接令人想起最能受惠於美國樓市的創科實業（00669）。創科主要在北美產銷建屋及裝修用的電動工具，北美新屋動工及銷售數據，也成為基金預視創科表現的寒暑表，經過兩年重組業務及品牌營銷策略，去年盈利基數低的創科，業績不難有較大幅度改善，旗下幾個知名電動工具品牌：Milwaukeer、AEGR、Ryobir及Homeliter，產地遷移的好處也可望逐步浮現在未來幾年業績上。

過去半年，創科股價在8.5至10.5元之間上落牛皮，昨日午後突見異動，抽升0.46元見9.9元，可惜成交未算配合，且看買盤是否即日鮮咁短癮。以基本條件及目前估值，創科股價向上機會要比向下高得多，不妨密切留意短期股價走勢。

一夜致富機遇不再

特首搞居屋「抽獎」計劃，年年幸運兒5,000個，年輕朋友問，點可以迅速由股市累積財富，以備日後上車需要。老實講，好抱歉，今時唔同往日，港股八九十年代，多得中港兩地經濟起飛，機會確實比現時多，過去廿幾年，古勝親身經歷九十年代工業股、莊家股、之後地產熱、紅籌注資概念，二○○○年科網股，仲有掹車邊威過一陣的濠賭及新能源概念，反觀今日，中國經濟神話備受考驗，中央認清形勢調節經濟增長重質多於重量，本地上市企業也呈現經濟發展成熟地區常見的滯悶情況，已看不到短期有機會，再出現一個全（股）民參與的當炒概念。

九七年港股高峰16,820點，十五年後，今日恒指累積升幅一成四，買入長揸顯然再行唔通，搵錢容易嘅黃金日子亦都成為過去式，今日炒股唔炒市年代，游資四圍搵短期停泊處，不同類板塊中穿梭搵食，舉個例，今年死抱內銀股卻同內房絕緣，回報肯定唔理想，要繼續在股壇制勝，一定要摒除一夜致富想法，更要多留意經濟新聞，最好能每兩個月審視各類股份前景及資金流向。

恒指現水平仍較去年底高出4%，表面睇唔係太差，但實際上唔少股份股價迭創52周低位，如內需、電訊設備、汽車、金飾珠寶股，搞到股民損手爛腳。可以肯定嘅係，今時今日嘅大淡市，比○八年有過之而無不及，未來幾個月魚缸極受全球政治因素影響，表現將更加難測，所以將資金停泊喺債市，未嘗唔係較自保嘅方法，事關魚缸喺覆巢之下，難有完卵。

睇往績息率唔穩陣

至於仍然停留喺魚缸嘅資金要搵避難所，類似公用股電能（00006），以及同屬大半隻公用股嘅領匯（00823），業務性質較為穩定，而且息率唔差，被視為避險之選。不過，要喺中企股之中發掘高息股就要相當小心，好似本周三個交易日股價下跌兩成多嘅中國龍工（03339），大利市機顯示往績息率高達10厘，可能會令專吼高息嘅股民眼發光。但翻查資料，原來公司喺六月初已經就中期業績發出盈警，預計純利將大減，換言之今年派息好可能不及往年，睇住個往績息率來做入市決定，分分鐘跌落陷井而不自知！

古勝