美國研究機構香櫞（Citron）最近轉軚，唔再叮住中資股唔放，最新目標係美國本土嘅公司，莫非怕咗財雄勢大嘅中國？有傳國家開發銀行出資協助喺美國掛牌嘅中資企撤退，就係最好嘅證明。
邊個咁唔好彩畀香櫞睇中？就係美國醫藥公司Questcor Pharmaceuticals，香櫞一做嘢，就令佢哋嘅市值蒸發咗8.8億美元，股價單日暴跌近22%。
絲絲睇番佢哋嘅戰迹，發現佢哋之前都試過唱衰美國公司，仲有好多沽空醫療股嘅前科添，例如做外科器材嘅Arthrocare同埋做醫療器械嘅Amedisys。
講番前排佢唱衰恒大（03333），嗰份報告有57頁之餘，仲專登配埋中文摘要，驚死一班香港投資者睇唔明。如果唔係呢次突擊，絲絲都冇乜留意呢間研究公司。之不過，佢哋唱衰完恒大，冇耐又「兜番」，聲言恒大冇舞弊同欺騙，只係會計手法激進啲，又話以後唔敢沽空中國股票，恒大其後又去報警，成件事令人覺得香櫞冇乜台型囉。