平保（02318）員工可減持股份嘅消息講咗一排，終於大功告成，二萬名平保員工經已袋袋平安，每人平均袋145萬元人民幣，成為百萬富翁！平保今次仲破埋中國上市公司史上嘅紀錄，係產生最多百萬富翁員工嘅造富運動。
呢個咁重要嘅創舉得以成功，平保董事長馬明哲功不可沒。佢話今次嘅股份轉讓，涉及7億多股、市值近277億元，據平安日前公布嘅分配方案同員工收到具體金額計，平安員工喺○○年前後進行投資，當時每份1.76元，按現在每份約58元計算，十年間投資收益近31倍。
馬總仲同絲絲講，員工股嘅收益係同當時股價掛鈎，並以相同比例計算所得，員工股能夠順利減持，長遠嚟講，對公司營運同股價都係好事。
絲絲都覺得對公司、員工同股東嚟講屬三贏局面。但原來有好多人唔滿意，覺得減持時機唔好，去年每份收益為稅後75蚊，今年60蚊都唔夠，而且繳稅都係太多，搞到收益倍數，由舊年嘅43倍變成依家嘅31倍。又有49名員工同老東家對簿公堂，唔滿意分配安排，至今仲未宣判。