絲絲講場：梁高美懿臨走不忘Rose
恒生銀行（00011）尋日嘅股東大會，焦點都放咗喺梁高美懿身上，皆因佢正式交棒畀李慧敏（Rose），退任副董事長兼行政總裁一職。過咗34年銀行家生涯，有小股東更大讚梁太尋日特別明艷照人呢，佢着嘅桃紅色套裝又真係幾搶眼架！
梁太帶領恒生走過金融環境動盪嘅三年，有小股東就話好多謝梁太嘅貢獻，不過就有啲擔心咁問，之前滙豐精簡架構搞到員工士氣低落，依家Rose由滙豐空降，會唔會將呢種氣氛帶埋嚟恒生架？
對李慧敏有信心
梁太就對Rose投下信心一票，佢話同Rose相識多年，知道Rose係非常有經驗嘅銀行家，而且Rose尋日先上任，叫大家畀個機會Rose發揮。話說回來，梁太都係滙豐出身，依家咪又打理得恒生井然有序。
續做客戶兼股東
佢話同恒生嘅關係唔會中斷，皆因佢仲係恒生嘅客戶同股東。有股東要求恒生增加派息，梁太話希望持有嘅股票係穩陣為先，佢好相信恒生董事會嘅決策，更何況董事會有大股東滙豐嘅人，適宜派多啲息嘅話又點會唔應承呢。
要同一班同事分離，佢話好唔捨得，因為上上下下都好團結，早前同事特登為佢搞咗個送別酒會，唔單止本港嘅同事，連內地同事、以至以前滙豐嘅舊同事都有參與添，令佢非常感動。絲絲同好多恒生之友，都想同梁太講聲：後會有期！
余絲韻