劏房安全問題雖然引起好多人關注，但卻係唔憂賣。金占士最近睇報紙見到個樓盤廣告，一個五百幾呎嘅單位，居然可以有三個套房，究竟係乜嘢豪宅咁巴閉？再睇真啲，個單位位於葵涌舊區嘅舊樓，係唔係劏房真係心照不宣。
呢款單位可以咁高調攞出嚟賣，無他嘅，都係因為利潤率高囉。金占士個老友報料話，原業主喺一年幾前，即係額外印花稅（SSD）推出無耐後買番嚟嘅。當時買入價大概百零萬，依家過咗一年，SSD稅率跌到去樓價5%，以單位叫價150萬元計，即係要畀印花稅七萬五蚊，再扣埋佣金，原業主帳面應該仲可以執十幾萬元，兼且呢個單位打算邀請有興趣買家拍賣，分分鐘成交價會再高啲添。
老友仲話，三個「套房」估計每個可以租到四千蚊多啲，即係話租金回報率分分鐘接近六厘，回報真係非常之吸引。不過金占士想提醒大家，高回報都同時暗示高風險啦。尤其係候任特首嘅政綱都寫到明，會全面調查劏房、籠屋、板間房嘅居住情況，制訂合適安全及衞生標準，值唔值得投資真係要諗清楚喇！
金占士