絲絲講場：恒生銀貸重情義攞第一
歐資行慢慢撤出亞太區銀團貸款市場，亞太區嘅本土銀行乘勢而起。今年首季恒生銀行（00011）喺銀團貸款市場拎咗安排行第一，恒生企業及商業銀行業務總監林燕勝（Donald）好謙虛咁話，唔係特登要做第一，好多單生意都係舊年至今一直傾落嚟嘅，咁啱客戶有需求，幫到手又有生意做咁啫。
做安排行一定「坐貨」
好多歐資行逐步撤出呢個市場，區域銀行乘時而起，好似澳洲、台灣，甚至日資行咁。恒生做本地行咁多年，上一季香港銀團貸款，有三分之二都係由恒生做安排行，打破咗連續七年由中銀香港（02388）做龍頭嘅慣例。
Donald話，恒生做完安排行嘅銀團貸款，自己「坐貨」至少佔一至兩成，唔會做完轉個頭就賣走晒啲貸款，所以業界都幾畀面，而且依家資金都唔算無出路，客戶亦更加重視銀行信唔信得過，言下之意，呢排生意真係幾好做。