絲絲講場：領匯無得尋味改玩懷舊
早排領匯（00823）個「尋味時光」活動，畀網民圍插同惡搞，最後爛尾收場。當大家仲記憶猶新之際，領匯「再接再厲」推出懷舊活動，不過今次只係喺旗下龍翔廣場同黃大仙中心兩個商場度搞，個名叫做「玩具時空廊」，諗住喺「五一」長假期吸引多啲顧客。
收集玩具捐畀基層
今次個活動係同香港基督教青年會「玩具銀行」合作，第一次喺商場設立收集箱，希望進行玩具大募集，仲話新舊都唔拘，主要目的係收集一千件玩具捐畀基層家庭嘅小朋友，希望宣揚「分享就是祝福」嘅理念。另外仲請到香港出名玩具收藏家鍾燕齊揀咗一啲以前嘅經典玩具出嚟展覽，好似有「東風牌」玩具車、絕版遊戲棋等等。
可能呢啲對於現代玩電子遊戲機大嘅小朋友嚟講，真係好新鮮，絲絲當然亦明白到「施比受更有福」呢個道理，所以覺得成件事其實都好有意義。之但係細心諗諗，當大家真係喺櫃底摷啲玩具出嚟嗰陣，會唔會諗起件玩具係喺屋企樓下嘅文具舖、玩具舖度買嘅，但依家文具舖已經買少見少，咁樣嘅話唔知會唔會再次勾起網民對領匯嘅不滿呢？絲絲又唔係好明，點解領匯係都要玩懷舊，咁好容易「撩起」人哋把火o架嘛。以上純屬揣測，絲絲都希望個活動成功，幫到啲基層小朋友嘅。
余詩韻