歐元區目前嘅經濟咁疲弱，對未來英國嘅央行──英倫銀行掌舵人嘅期望高啲，一啲都唔過分。絲絲收到風，對於加拿大央行行長卡尼過檔做英倫銀行行長嘅傳聞，喺英國相當有地位嘅渣打銀行集團（02888），佢哋位主席莊貝思幫番自己人，話明寧願由英國人去接掌英倫銀行行長個位。
金融海嘯之後，金融機構同監管者嘅關係變得緊張，所以莊貝思都認為，接棒人嘅先決條件係要同各大英國嘅相關機構打好關係，先至可以旗開得勝。莊貝思話自己唔係古板，雖則佢唔否定喺海外會有更好嘅候選人，但佢認為既然係英國嘅央行，用番英國人會適合好多囉。
渣打行政總裁冼博德，亦有份獲提名為英倫銀行行長候選人，之不過佢對自己目前嘅事業感到好開心，仲話依家份工好正，冼博德話銀行對經濟增長同增加就業機會嘅貢獻，扮演住一個好重要嘅角色。莫非真係神女有心，襄王無夢？
出任英倫銀行行長十三年嘅金默文，將會喺明年六月卸任，目前呼聲最高嘅候選人係現任英倫銀行副行長Paul Tucker。究竟邊個做英倫銀行掌舵人？絲絲認為最緊要大家達至共識，唔係點樣攜手去振興歐元區嘅經濟呀！
余絲韻