係人都識得股神「巴菲特」，但就肯定唔係人人都聽過佢年少時嘅奇遇。其實連絲絲我都未聽過，但《福布斯》最近就上載咗一篇由巴菲特親自撰寫嘅文章，記載咗佢25歲時嘅經歷點樣改變佢嘅一生。
話說巴菲特年少時就已經封咗「價值投資之父」格雷姆做偶像，有一日佢忽發奇想，寫信畀格雷姆推銷佢嘅投資計仔，格雷姆好欣賞，就係咁巴菲特就入咗格雷姆公司做喇。
第二年，巴菲特25歲，格雷姆準備退休，想交棒畀巴菲特，打理佢嗰600至700萬美元嘅基金。
巴菲特當時面對人生交叉點，佢揸住12.7萬美元，就已經打算帶埋老婆仔女返奧馬哈市退休，佢計過條數，話佢哋每年用1.2萬就夠過世，因為複合利率可以令佢致富喎。結果，巴菲特都係揀咗返家鄉。
有一日，有幾個親戚走嚟搵巴菲特，想佢提供投資貼士幫佢哋賺錢，巴菲特答應咗，就係咁每人拎咗啲錢出嚟合作做投資。
之後，巴菲特打理嘅基金仲吸引埋外人，連佢嘅恩師格雷姆都有份介紹客仔畀佢識添！
巴菲特諗番轉頭，都覺得25歲係佢人生轉捩點，佢形容佢嘅人生不斷轉變，直至佢成立投資旗艦巴郡，佢都從未驚過，因為佢係做緊佢鍾意做嘅事情，到家吓都仲做緊。絲絲睇完少年巴菲特傳奇嘅經歷之後，都覺得好激動啊！
余詩韻