金占士有位核數界友人吐苦水，佢話核數師愈嚟愈難撈，金占士知佢近期接job接到手軟，因乜解救話行頭難撈？據友人解釋，喺今年四月一日或以後舉行嘅上市公司股東大會（AGM），公司核數師必須現身，就核數報告有關嘅問題接受股東質詢。
核數師出席公司AGM面向股東提問，其實係國際會計準則嘅新例。舊年十月港交所（00388）已將之寫入上市規則，對終日埋首數字嘅核數師，畀股東質詢係件苦差，依家投資者重視股東權益嘅大氣候，核數師稍一應對失當，隨時有麻煩上身。
友人同金占士講，預咗嚟緊嘅AGM有唔少疑似股壇長毛David Webb嘅股東問問題，但佢最怕係股東無長毛咁專業，對核數工作了解半桶水，核數師當面話佢唔識嘢又唔得，解畀佢聽又唔知佢係咪真係明白。
會計師公會就度咗啲方法，教核數師點樣應對。佢哋出咗份Technical Bulletin（TB），教核數師點樣應對股東嘅尖銳問題，特別係問及同核數無關嘅問題，點樣將個波推番畀管理層，其中公會模擬嘅問題係咁，「你喺核數過程，有無受到管理層嘅任何限制？」，以及「可唔可以講吓你同管理層關係，例如有無不和？」，標準答案係點，各位可以參考呢份TB。TB喺醫學上係肺結核的簡稱，老友笑住話呢排真係日日肺結核上身。
金占士