Market Insight：恒安復甦故事動人

伯南克未入聯儲局前，係普林斯頓大學經濟學系主任，也是研究一九二九年經濟大蕭條的權威，唔信佢信邊個。如非善忘，兩星期前先話過，吸取過去美國低潮及寬鬆措施挽救經濟的經驗，退市不能太早，前晚畫公仔畫出腸，推QE3睇怕只屬遲早問題。

但都係嗰句，要QE先決條件是美國通脹低，股市及經濟數據轉差。尤其QE1、QE2經驗，每次印錢可以推高美國通脹接近2%，美國二月CPI企穩2.9%水平，如果QE3唔係美國媒體流傳的沖銷式QE，目前高於目標通脹2%的情況下，即時推出條件未配合，周一美股表現可見，單是出口術華爾街班炒家已經相當高興，有失而復得的感覺。

放大圖片

放大圖片

人行隨時再度放水

三月份滙豐中國製造業採購經理指數去到48.1，一葉知秋，貸款需求疲弱由息口走勢可見一二，六個月期上海銀行同業拆息，出現近三年來最大跌幅，從二月初接近5.415厘，跌到尋日5.11厘。內地開始揣測，人行可能短期內再減存款準備金率放水，甚至提早減息。

隔晚所見，美元弱，金價反彈，股市勁升，會係一日貨仔抑或長炒長有，有待觀察，高位回落過千點的港股，借外圍轉勢反彈，高開後全日恒指在高位徘徊，升378點，收報21,046點，可惜成交極奀主板得551億元，即市波幅僅167點，悶得可憐。

期指炒家見歐洲期貨開高，三月份期指等現貨收市後，愈挾愈狂，十五分鐘時間挾高120點，最後以21,154點收市，高水108點，連日沽空比率高企，以為淡友會稍為收斂，殊不知結果頗意外，沽空比率第7日上升，去到12.2%。周四結算前，看來好淡友會有一番龍爭虎鬥。

紙漿價格見頂回落

恒安國際（01044）派發成績表，賺26.49億元增長8.6%，符合預測中位數，期內營業額升27%，達破紀錄的170.5億元，增長放緩主要是紙漿價格於去年上半年高企，拖累毛利率從二○一○年的44.3%，降至39.9%。

以一間估值33倍公司，單位數增長難免令人質疑值唔值，見尋日公布業績股價不跌反升，大致可以知道大孖沙的答案。尋日特登去問分析員老友點睇，佢話近期唔少內需及消費類股份，業績瓜多過菜，恒安這類四平八穩，一定有捧場客，尤其紙漿價一一年上半年去到高峰，基數較低，中期業績一定好睇，推銷比客戶時大把夠動聽嘅古仔。

話時話，恒安可見的一年之間，應可享受原材料價格回落的好處，一一年業績拆開上下半年，毛利率由上半年38.59%升返去41.2%，同恒安一般的43至46%仲係有距離。睇番國際紙漿價格，由去年六月高位回落大約17.6%，以大約兩季左右滯後，今年第二、三季恒安毛利率應該可以恢復舊觀，以一二年25.8倍市盈率來看，對比過去三年22至36倍的歷史波幅，仲係中下游水平，睇情況再穿70元機會唔大。

招金彈跳力最充足

受到前晚伯老言論影響，美金下跌，金價飆升，刺激金礦股起動，其中最近表示擬向母公司收購山東及新疆金礦探礦權的招金礦業（01818），股價升4.7%，收報13.76元；紫金礦業（02899）及靈寶黃金（03330）同升逾3%。若以升幅計，則以中國黃金（02099）表現最佳，全日高位見39.2元，收報38.3元，升6.5%。

古勝認為，在眾多金礦股之中，招金的股價走勢與金價表現關連性較高，若睇好短期金價走勢，可視之為首選股份，反彈浪下兩個阻力位分別在14.4元及15.3元，支持在13元。

古勝