渣打集團（02888）最新年報尋日出爐，又係時候比併一下渣打一眾賓卡舊年嘅總酬金。集團行政總裁冼博德加咗3.48%，去到6,279萬元，集團執行董事白承睿就升4.79%至約3,697萬元，而財務董事麥定思則加咗3.26%到4,360萬元。
至於比較敏感嘅現金花紅，佢哋三位只有白承睿有增長，加咗5.88%到約280萬元，其餘則無增長，分別企穩五百幾萬元同三百幾萬元。
渣打舊年業績繼續靚仔，再次破頂，賺47.48億美元（約370.3億港元），增長12.2%，絲絲認為佢哋身價嘅升幅，唔及盈利增幅嘅一半，算係好合理啦，小股東條氣都順啲。
不過，冼博德嘅身價六千幾萬元，比滙控（00005）行政總裁歐智華都仲低一截。歐智華舊年嘅總酬金有8,801萬元，話晒滙控舊年嘅盈利勁飆27%至約1,261億元喎，絕對值架。