絲絲講場：嘴饞張天生搵食艱難
唔經唔覺，第二階段港股加時已行咗兩個禮拜有多，成交有冇多咗，大家自己計數喇，絲絲反而有興趣知道，金融界出晒名嘅食家，點樣度過加時後食中午飯嘅日子。
飯堂最緊要「就腳」
有邊啲食家？絲絲第一個就諗起資深經紀張天生，佢話過去呢兩個禮拜，十日有成七日都係幫襯最「就腳」嘅新證美食，因為由佢公司行過去只需五分鐘左右。至於佢平時去開食午飯嘅幾個「架步」，好似馬車會所、上海總會等，就冇得去喇，因為行得去、叫埋餸，可能趕唔切返公司睇下午開市。
佢依家已經喺呢間餐廳長期訂咗張枱，絲絲日日幫襯同一間指定「飯堂」問題唔大，不過，張天生平時「不時不食」，食嘢刁鑽，都要無奈揀選餐牌上指定嘅set lunch。好彩個set lunch餐牌都叫做日日轉，有唔同選擇！
少咗好多人生樂趣
喺過去嗰兩個禮拜，試過有一日時間太趕，要叫外賣三文治返公司食。張天生話，「食三文治冇話唔得o架，但辛苦搵來自在食」，無癮啫！
而且佢話依家出外食飯，只有好趕嘅感覺，完全傾唔到偈，「滾水淥腳」咁，真係少咗好多人生樂趣。佢慨嘆自己還好，因為年紀大，隨時可以退休唔做，加上公司人手充足，可以隨時搵人頂住先，遲返公司一陣都冇所謂，但其他行家就未必可以咁喇。
最弊仲係午飯後「雞咁腳」咁返到公司，但係又冇乜嘢做，打電話畀客，客又食緊飯，「悶爆」簡直係佢心聲！
余絲韻