Market Insight：科網股可塑性高

日前提到，祖國放棄保八，一、二月外貿數據教人失望出現十年來最大逆差，加上三月盛傳新增貸款數字未達標，古勝尋日提出要小心數據會震散中資股，勢估唔到，就連兩輪長期再融資操作（LTRO）水浸銀行體系的歐洲老大哥德國都要出事，不但差過分析師估計由二月50.2回升至51水平，就連服務業PMI亦遠低過預期的53.1，得51.8。

數據一出歐股跌到四腳朝天，投資者面對現實下，去年第四季開始的股市小陽春可能因此告一段落，可以相信慣了水浸的金融市場，好快會期望歐央行繼續大開水喉，兩輪LTRO後，再巧立名目為刺激經濟增加流動性，押後成員國收緊財政紀律的時間表。

眾大孖沙謀定而後動

尋日飯局，老友繼續高談闊論有得睇無得揀的小圈子選舉，星期日開大定開細，抑或開圍骰都好，唯一確定的係，大孖沙唔會同錢有仇，實行睇定先算，昨主板成交縮到唔夠500億元，可見空軍相當有把握，一連兩日沽空佔成交比例高於一成，是一月初以來首次。收市後幾份成績表都令捧場客失望，農行（01288）及聯通（00762）都差過預期。

喺早幾日，中電信（00728）去年業績在第四季3G搶客交數下，手機補貼勁升，盈利如水瓜打狗，聯通全年賺42.3億元人民幣，比預測少足足10億元，將首三季賺42.6億元一併比較，第四季蝕數千萬元，睇怕今日插到12元附近，試一年新低可能性相當之大。

本地幾間電訊商，早前準備取消無限上網月費變相加價，最後群情洶湧下，惟有先變招轉為限速限量。然而，事件告訴港人，長期享受低廉電訊服務的日子，可能一去不返。

免費資訊年代成歷史

隨着智能手機，平板電腦等流動資訊科技硬件普及，與日常生活應用不可或缺，有迹象顯示，二○○○年科網熱後，資訊、互聯網及電訊等低收費甚至免費日子可能成為歷史。最近美國《紐約時報》及《華爾街日報》等網站全面向用戶收費，行動惹來極大回響，用家認為是自殺式行為，可是更多分析員相信是網上資訊不再免費的時代，走出第一步。

蘋果公司及Google是值得借鑑的出色例子，前者透過iTunes及iPhone，向消費者售賣下載軟件、音樂及電影；在過去十年，當大家習慣了在Google搜尋引擎搵資訊，不其然推動這網上廣告收入為主的網站，盈利由不到1億美元升至去年97億美元，膨脹百倍。

早前一個高官與小三慶祝生日照片，能夠一夕之間傳遍內地網民，微博在內地發展與資訊流動速度，同樣驚人，由零開始，到今日全國用戶超過3億，只係短短三年。目前內地市場基本上由美國上市的新浪網（SINA），以及騰訊（00700）兩分天下。

微博化身為撳錢寶藏

實體經濟唔掂，又怕樓價造成社會矛盾，人行放水放得鬼祟，君可見今年芬佬情願睇番賺錢能力絕不遜色的虛擬網界。早前有美資大行唱好新浪，話單係未賺錢的微博生意，經已值50億美元，仲高過前晚公司市值48億美元。

騰訊今年都唔失禮，股價累積升43%，跑贏大市幾條街，除非閣下認為內地用家一日撳幾十次睇到實的微博會在世界消失，否則在全面商業化，開始賺錢之前，這門生意估值的可塑性可以相當大。

去年下半年環球經濟轉差，加上唔少投行為交差IPO質素幾差都照接JOB做，有心理準備呢輪業績期可能會有更多半新股或中小型股份出問題。

此外，雖然恒指變動唔大，但多個板塊卻已出現洗倉潮，就如金飾鐘錶股，六福（00590）已連跌六個交易日，周大福（01929）周三創掛牌以來新低，東表（00398）、英錶（00887）和周生生（00116）走勢亦唔多對辦，短期都係避之則吉！

古勝