上周最重要嘅消息，當然係落實咗嘅第二輪長期再融資操作（LTRO）！歐洲央行不斷借錢出街，未來經濟情況有可能比希臘拖垮。借錢畀人容易，希臘喺無計可施之下，必定先拎錢為敬！但係當要緊縮財政，慢慢還錢時，希臘政府有極大機會選擇違約。所以，今時今日唔違約，唔代表日後安全！
歐洲央行公布第二輪LTRO貸款結果，連同去年十二月首輪貸款，合共向銀行體系注資超過10萬億港元。大家成日話美國人借錢借得勁，依家似乎歐洲諗住同佢一較高下！鬥好就全球好，鬥衰就真係唔知會點喇！
呢次政策得益者，當然係可以用低息借錢嘅銀行啦！不過，佢哋拎錢拎得開心，冇受惠政策嘅機構，就要諗平錢氾濫將會造成嘅惡果！以依家趨勢推斷，下一次金融危機嘅種子已經埋下，未來極有可能會再次爆煲，只不過呢個計時炸彈唔知幾時會爆。
第二輪LTRO借出約5,300億歐元，參與嘅銀行約800間，當中好多都係中小銀行，大部分來自德國。歐央行呢種融資安排主要想解決銀行體系嘅流通性，至少令佢哋可以喺市場借錢周轉。不過，冇乜問題嘅德國銀行點解都會走嚟借？原因好簡單！有個錢擺係褲袋都係好事！