近期掀起一片商品熱，港交所（00388）高調話要進軍商品市場，市場仲盛傳佢有份競投LME（倫敦金屬交易所）添，而打正旗號做商品嘅香港商品交易所亦都有新動作，原來幾個月前靜靜雞引入咗個新股東，以壯大股東同資本基礎，應付市場挑戰同機遇。
呢名新股東就係彩虹集團，幾個月前成為商交所其中一名股東，由於彩虹集團喺香港冇上市，所以大家對集團認識唔多。但根據商交所網站介紹，彩虹集團總部設喺香港，主要喺內地經營航運、投資、房地產同商業開發等業務。
彩虹集團創辦人及主席莫峰，已經加入商交所成為非執行董事。但彩虹集團入股商交所多少股權，同入股嘅金額，絲絲就八唔到喇！
商交所主席張震遠呢期因為特首選戰而好忙，但聽講佢都心繫商交所，日日都有返工，都算出心出力！