世界銀行行長佐利克任期喺六月就屆滿，前排聽講美國總統奧巴馬物色緊接任人選，雖然依家仲未落實，但原來佢開頭考慮嘅人選都好「闊」o架，唔會限制喺銀行抑或政界出身，就連微軟創辦人蓋茨，同百事可樂執行長努伊，都曾榜上有名o架。
不過，白宮已經將考慮範圍縮細，前財長薩默斯、麻省民主黨參議員克里，同前國務卿、現任美國駐聯合國大使賴斯都係人選，只不過仲未有人應承，而蓋茨同努伊嘅發言人直情唔出聲，一於唔回應。
巴西、墨西哥同中國，都對美國霸住世銀行長個位唔多滿意，仲話應該破除由美國人擔任嘅特權。如果發展中國家聯手，造就非美籍嘅人選當選，咁美國嘅優勢會即刻冇咗。奧巴馬已經要求幕僚快啲擴大潛在人選名單，仲猛嗌白宮會提名一個美國人添。
至於一向由歐洲人擔任總裁嘅國際貨幣基金組織，尋日就宣布任命喺國基會做咗22年嘅林建海做秘書長，喺今個月二十二日生效。
擁有喬治華盛頓大學博士銜頭嘅林建海，係國基會成立咁耐，第一個坐到咁重要職位嘅中國籍僱員，以後要負責執行董事會嘅日常保障工作，同187個成員國嘅日常聯絡事宜。