絲絲講場：滙豐捐食物唔使嘥料
通脹高企加重小市民生活擔子，對食物銀行嘅需求愈嚟愈大。傳統銀行都出一分力，滙豐喺農曆新年後就搞咗個食物捐贈計劃，向員工募捐咗超過1,000袋食物，送晒畀志願機構，幫到人又環保。
由馮婉眉代表送出
據絲絲了解，今次已經係滙豐第九年同聖雅各福群會搞呢個食物捐贈計劃，而同滙豐仁愛堂仁間有愛社區支援中心拍檔，就係第二年。
今次代表滙豐捐畀聖雅各福群會同滙豐仁愛堂仁間有愛社區支援中心嘅食物，鋪陳起上嚟的確幾澎湃，應該幫到唔少人，由滙豐香港區總裁馮婉眉（Anita）同埋新上場嘅亞太區企業可持續發展主管Malini Thadani做代表送出。
其實滙豐總行飯堂都有好多環保計劃，聽聞佢哋好似會用咖啡同廚餘畀同事種植物，種出嚟嘅植物會靚啲，可見佢哋搞環保，都用咗幾多心思。