恒生銀行（00011）副董事長兼行政總裁梁高美懿即將退休，作為藍籌銀行股嘅首位女行政總裁（CEO），梁太巾幗不讓鬚眉，自有一套人生哲理．原來梁太好唔鍾意職員凡事「Say No」，佢認為唔怕辛苦，唔怕麻煩先至係正確之道，亦幫梁太解決咗好多「不可能的任務」。
講起「Say No」，絲絲記得有套西片叫「乜都得先生（Yes Man）」，戲中主角咁啱係銀行職員，直到參加「Yes」講座先凡事「Say Yes」，其後改變人生。「把NO變成YES」係梁高美懿嘅一個人生信條，唔知梁太係咪都好鍾意睇呢套片呢？
梁太喺一九七八年加入滙豐，○九年出任恒生CEO，職途一帆風順。梁太就話，最怕人哋話佢做到咁高層，係因為女性身份，佢強調成功秘訣係利用一切機會學習新知識，面對困難永遠唔會退縮。
雖然佢同幾位恒生CEO一樣，都係空降入恒生，但梁太入去之後，好積極搞好上下溝通，上任恒生第一件事，就係主動開咗個Blog同員工溝通，結果好快就融入恒生大家庭添。
余絲韻