市場熱線：遠東宏信隨時發力

其實呢兩日好消息都唔少，花旗國傳推「改良版」QE，巴西大幅減息75點子，今日祖國公布二月CPI同花旗國公布非農職位都令人有所期望。雖然溫總對今年通脹目標定喺好保守嘅4%，但坊間預測二月CPI會降到3.5%，甚至低到3%，不過，古勝對其他經濟數據仲有興趣，一月數據差仲可以「賴」過年，但一、二月數據合併解讀就真相大白。

祖國利好傳聞不少

喺兩會之後，傳聞好多國策會啟動，包括養老金入市試點、減奢侈品稅、成品油價格改革等等，其實以上都係只等時機成熟，但減奢侈品稅嘅問題較複雜，因為涉及唔同部門嘅利益衝突，但「趴打」（01913）尋日炒定先。

至於傳聞中嘅擴大房產稅就冇乜反應，淨睇呢個禮拜內房股跑贏大市已知道，因為就算擴大試點亦只係北京市，而市場更關注首套房貸鬆綁。不過，唔單止內房鬆綁政策被經常叫停，連限制政策竟然亦有彈簧手，上海唔畀未婚人士買第二套房政策話咁快取消，其實相當正常，好多人都係先買樓後結婚，亦可見好多政策係唔經大腦。

蘋果公司迷熱切期待嘅iPad 3卒之出場，但原來只係高清同4G版，蘋果隔晚股價有反高潮，香港隻瑞聲（02018）亦逆市微跌。尋日唔少股報復性反彈，今日可以留意中交建（01800）A股上場有乜反應，中證監搞新股改革，想壓低新股招股PE，而中交建係以超平PE上市，如果都升唔起就證明唔關PE事，但睇呢排中交建H股表現似乎幾有信心喎。

央企背景較具信心

內銀頭兩個月新增貸款已經少，聽講三月頭幾日更係負增長，買內銀股不如買民間借貸股，所講嘅兩隻係中國信貸（08207）同遠東宏信（03360），前者已派咗成績表，走勢依然強勁。宏信則定佳期喺21日，公司已發咗盈喜，預計舊年全年可以賺多逾55%，計全面攤薄PE則係15倍，而中國信貸只係11倍，但宏信計市值係中國信貸10倍有多，鍾意買龍頭股嘅反而會覺得前者較抵買。

講背景，宏信阿媽係央企中化集團，起碼唔似民企條數唔知真定假。集團主要係做設備融資租賃，壞帳風險較低，中小企問唔到大錢莊借錢，所以要問宏信，今年嘅經營環境仍會唔差。隻股牛皮咗4個月時間，會唔會借住放榜有突破暫時係靠估，但喺公司股價冬眠期間，其他股已追晒上嚟，就連中國信貸估值都拍得住佢，業績前後仲唔發力要等幾時？