孖妹缸湖遊：魚缸女將代父掌證列傳

睇番資料，本港B組經紀行嘅市場佔有率，由舊年一月約37%跌至十二月嘅31.5%；同期C組經紀行市佔率亦由12%降至唔夠10%。確實，自從港交所（00388）取消最低佣金制，近年又有證券行出現割喉式減價搶客，而今日港股亦喺一片業界反對聲音之下推行加時，證券行業看似愈嚟愈難撈，不過難撈唔等於無得撈！

正如繼承父業嘅勝利證券總經理高鵑所言：「汰弱留強係現實，但只要你喺逆境中搵到定位，咁就一定有得做。」而致富證券副總經理周韻姿亦好肯定咁講：「你唔行前，就只會墮後，所以繼續向前行就得喇。」呢兩位喺人哋眼中嘅「太子女」，喺打理父親一手創立嘅證券行生意上，既有膊頭，亦有腰骨，盡顯女人本色。

高：勝利證券總經理高鵑

周：致富證券副總經理周韻姿

高妹： 屋企做證券生意，你哋係咪去證券行做功課o架？爸爸係咪由細到大同你哋做「未來接班人」心理建設？

　高： 以前中學嘅暑假，我都喺證券行做暑期工，嗰時所有股票都要實物交收，當時我就係每日拎住啲股票，喺中環跑嚟跑去，將股票拎畀客人。因為呢啲經驗，令我對金融行業都有啲興趣。後來，我喺加拿大讀完大學，喺當地做過幾年推廣工作，九○年就返香港幫手證券行生意。其實，爸爸都無逼過我要接手，都係自己揀嘅！

入證券行由低做起

周：記得細個喺證券行試過幫啲文件「吸」印花，之後去咗加拿大讀書，九七年加入證券行，由幫客戶落電話盤做起，真係個個崗位都做過，後來先開始去見客、開分行、搞公司形象。不過，爸爸好勤力返工，依家大家都係跟住佢去做嘢！

祺祺： 夕陽無限好，只是近黃昏。中小型經紀行數目日漸減少，加上市場又有行家進行割喉式減價搶客，你哋點樣睇同埋應變？

高：唔同證券行有唔同嘅市場定位，而客戶亦有唔同種類，有人鍾意佣金平，亦有人鍾意服務好，所以我覺得各取所需。不過，割喉式減價對證券行業嚟講，並唔係一個健康現象，因為市場上嘅投資者唔會全部都係專業，當佣金太平，而服務又唔夠，頻繁嘅投資買賣，最終可能係害咗佢哋。

周：無可否認，呢個行業係愈嚟愈艱難，不過我哋做生意係講信譽、誠信、以客為先，所以有好多客戶真係跟咗致富幾十年都無離開過。當然，未來我哋會繼續開拓更多金融產品，同埋提升服務質素。

高妹： 繼承父業，加入競爭激烈嘅證券行業，你哋有咩得與失？

高：嗯。得到充實嘅生活，但失去陪伴家人嘅時間。記得我女兒喺九四年出世，但喺九五至九七年，港股好旺，證券行嘅工作可以話係日以繼夜，加上當時好多嘢仲未電子化，要人手去做，嗰時我真係星期一至日都要返工，好少見到個女。我諗，一個全職媽媽對一個小朋友嘅成長影響會好大！

失去親子活動時間

周：我有兩個小朋友，一個六歲幾，一個四歲幾，但平時都係早出晚歸，所以好少時間陪到佢哋，就算見到面都會有一種好掛住嘅感覺。其實親子活動真係好重要，所以我都希望盡量抽多啲時間陪佢哋成長。

祺祺：我知道勝利證券創辦人高德泰先生，同埋致富證券創辦人周松堦先生，兩位都仲有返工，但你哋有無諗住培訓下一代做接班人？

高：有能者居之。接班人唔一定係自己嘅小朋友，佢哋年紀仲好細，仲讀緊書，所以未需要諗呢個問題住。但如果將來佢哋有興趣入行，我都會要佢哋由低做起，了解成間證券行嘅運作流程，絕對唔會有所偏袒。

周：每個人都有佢天生獨有嘅優點同才能，當佢搵到自己喜歡嘅工作時，自然會開心同埋有滿足感。如果我嘅小朋友將來日日望住個股市，日日賺緊錢，但佢都做得唔開心，咁又何必呢？所以只要佢哋可以發揮所長，人生過得開心就可以喇。

高妹：未來證券行會有咩經營策略？例如擴充分行？搞上市？

高：行業環境不斷咁變，我哋都會發展更多種類嘅金融產品，當然亦會繼續提升服務質素。而勝利證券嘅定位係要成為一間最優秀嘅投資服務中心，針對投資者嘅需要，為佢哋提供全方位兼且個人化嘅投資理財一條龍服務。

周：現時致富嘅分行有20間，可以話係遍布港九、新界，相信已經照顧到唔同地區嘅客戶。至於上市計劃，雖然我哋未有時間表，但對呢件事係抱開放嘅態度，總之一切隨機應變，根據環球市況、行業環境而作出不同嘅管理策略。

從來守業比創業更難，孖妹見到勝利證券同致富證券兩位老闆，高德泰同周松堦先生退而不休，日日精神奕奕咁返證券行打理生意，同自己位千金拍住上。呢個咁溫馨嘅情景，相信佢哋嘅證券行生意只會蒸蒸日上，絕對唔會「近黃昏」嘅！

高妹、祺祺

若有料報畀高妹同祺祺或有嘢問，可電郵money.biz@opg.com.hk