市場熱線：創維有望重返高位

總結全個禮拜升咗155點，樂觀計長期再融資操作（LTRO）第2筆嗰5萬幾億遲早有部分會流入魚缸，但港匯反而偏軟，成交額亦停滯不前。

徵房產稅機會不大

上周五風電股受追捧，如龍源（00916）、中風電（00182）、大唐新能源（01798）等，消息話又會有頁岩氣十二五規劃即將出台。

內房股又再飆升，有鬼佬報紙話4大錢莊要做多啲房地產貸款，內房A股4大龍頭齊升逾4%，並帶動深成指升2.38%，水泥股亦傍住升。古勝上個禮拜話過，阿爺只係想樓價跌，唔係想樓市死，所以房產稅係流料居多，若要實施早喺舊年實施咗，今年先實施隨時落錯藥。

今日開始食飯時間得一粒鐘，要把握呢排牛市搏殺，最好都係叫外賣；如果唔係咁博，一點到一點半唔睇個市亦冇損失，但呢排係放榜高峰期，要注意愛股有冇喺中午派成績表，否則隨時食完飯返嚟股價大走樣。

本地一月零售額增長唔夠15%，3大金飾股依然頭耷耷，本地零售股係弱勢，但呢排唔理咁多乜都炒一餐，所以不排除有突擊機會。至於內需股更係不死鳥，淨計人民收入增長呢瓣已可支持長線增長，霸王（01338）六日內升接近5成，維達（03331）亦升破11蚊再創新高，兩隻紅酒股通天（00389）同王朝（00828）都發威。

3D電視提高毛利

家電股呢排旺兩隻電視同一隻冷氣，TCL多媒體（01070）已派咗成績表，扭虧為盈，計落PE得8.7倍絕對唔算高，但講抵則始終係創維（00751），預測PE係7倍幾，但創維同其他中資公司唔同，年結喺三月，所以唔好以為今個月派成績表，但公司每個月都會公布電視銷量，業績唔使一味靠估。

創維一月銷量按年減少16%，皆因農曆新年假期，家電以舊換新政策又啱啱結束，所以銷量下跌好正常。如果冇新政策幫手嘅話，其實今年銷量難免放緩，但創維一早講定期望3D電視用毛利率補番數。依家消費者唔介意畀多一、兩千蚊追求新型號，就算創維今年量跌價升，盈利可望保持增長。

古勝成日話，熊市幾倍PE嫌貴，牛市十幾倍PE嫌平，依家平嘅公司已經買少見少，有實質業務支持嘅公司更少見。創維雖然近期亦係45度角上升，但計估值仍有上升空間，就算升到TCL咁上下PE亦可見5.3元，亦即五十二周高位附近。