憧憬中央政策微調，內房股尋日表現不俗，反而水泥股就有點疲態，逆市下跌。其實講到建材板塊，又唔係剩係得水泥一瓣，從事塑料管道及管件產銷業務的中國聯塑（02128），同樣受惠於調控放鬆，昨日隨大市升4.4%，以5.14元報收，尤其係尾市十零分鐘明顯有買盤殺到，將股價由5元急踢上全日高位5.16元，有留意價值。
雖然話做塑膠水管好似唔係好吸引，但聯塑作為內地龍頭，市佔率達11%，而且產品覆蓋面廣，不論供水、排水、供電、燃氣、通訊，都對管具有需求，何況聯塑七成產品用於政府工程，食正保障房概念，真係唔愁冇生意做。
雖然集團去年上半年業績一般，純利只升11%，毛利率更因成本上漲而下跌2.8個百分點，至23.7%，但隨着塑膠原材料PVC價格回落，下半年業績應可做番好啲。股價今年以來持續做好，但現價PE都係10倍左右，早排花旗出報告唱好，目標高達7元，詩詩打個八折都心足，睇5.6元，支持位4.8元。
詩詩