停牌近七年嘅連發國際（00875）尋日終於復牌，坐咗六年幾貨嘅蟹民可以盡情沽貨套現，呢間賣菜嘅公司尋日股價大跌28.5%報0.246元，最低更加見過0.17元添。不過連發嘅「白武士」許浩明（Herbert）就因為有啲個人原因，暫時做唔到公司嘅行政職務，惟有拉埋自己個老友吳偉驄入董事局，實行拍住上一齊賣菜咯。
先兩日連發嘅公告就話，Herbert因個人原因辭任執行董事、主席同法定代表。連發尋日嘅公告話聘Herbert為獨立顧問，為期一年，每月顧問費有成20萬元o架。
Herbert就搵嚟老友吳偉驄幫手，做非執行董事同埋非執行主席兩個職務。吳偉驄來頭都唔細o架，現年六十二歲，七二年畢業於港大法律系，曾經喺政府做過貿易主任、政務主任，九○年代喺證監會任職約十年。依家係貿易通（00536）嘅執行董事兼行政總裁，深圳控股（00604）嘅獨立非執行董事，真係能者多勞，身兼多職。