絲絲講場：中國「學者」叫世銀滾蛋
見慣大場面嘅世銀行長佐利克，尋日朝早喺北京開記者會時畀人鬧場。自稱係獨立學者嘅杜建國，喺會場散發份叫《世界銀行，帶上你的毒藥滾回美國去》嘅文件，直斥美國想用「私有化」整冧中國嘅經濟。佐利克聞言後仍好有風度話，會搵人翻譯杜建國嘅文件，同埋其他評論一齊考慮。
斥國企私有化係毒藥
世銀同國務院發展研究中心合編嘅《2030年的中國：建設現代、和諧、有創造力的高收入社會》報告，引起唔少人關注。杜建國批評，世銀參與設計上世紀九十年代開始嘅拉美私有化計劃全盤失敗，依家仲將套陳腔濫調當靈丹妙藥咁sell畀中國，仲提議將國企私有化，簡直係胡說八道。
走去外國金融機構高層出現嘅地方搞抗議，喺內地真係好罕見，杜建國好可能仲係「佔領華爾街行動」嘅粉絲。佢質疑佐利克同世銀係想中國嘅銀行業華爾街化，又大嗌「美國係要用私有化嘅毒藥整冧中國經濟，中國絕對唔能夠重複美國嘅舊路！」幾分鐘之後，杜建國就畀人挾走咗。
佐利克歡迎爭論抗議
對抗議活動司空見慣嘅佐利克一啲都唔在意，仲話歡迎爭論同抗議，最好係用「可討論」嘅方式。佢仲講，「正如大家睇到，份報告喺中國引起咗有趣嘅爭論，但係咪接納建議去進行改革，主動權係喺中國手上面。」
余詩韻