牛熊輪流炒：A50隨時開車可博16396
背靠內地魚缸威力，港股昨日早段還是呆呆滯滯，食過午飯返嚟就變得龍精虎猛，終在期指結算日挾高350點，幾近以全日高位散場，主板成交624億元。
滙控（00005）及恒生（00011）兩母子派完業績後，股價完全兩個樣，滙控一度跌至68元邊，恒生就一支大陽燭升至106.7元的近半年高位收市。滙控窩輪昨日成交減少，按日跌17%至8.4億元。恒生的窩輪就一向選擇少，市場上僅有七隻輪供購買，全日成交加埋都係得嗰幾百萬。
大市升，成交跌，窩輪整體成交見抽升，錄得92.31億元，較周一增加9.4%，相信是業績高峰期，股份無論見光死還是有驚喜，只要有波動，股民有心水，炒作氣氛濃厚都一樣利好輪場買賣。驟見今日出業績的港交所（00388）股價由低位浮上水面至144.7元水平高收，相關窩輪炒到不亦樂乎，全日成交達2.9億元。
其實，近期市場焦點除放在公布業績的大隻股身上，將召開的兩會同樣是不能錯過的議題，政策是否繼續傾斜於某些板塊，會否有微調出現，坊間都出現不同的版本。據過去多年的經驗，每逢兩會期間A股上升的機會相當大，A股近日走勢又似醞釀一輪單邊市，可趁機買Call。
安碩A50中國（02823）雖然一直較其資產淨值有明顯溢價，但相關窩輪相當活躍，股價又跟勢炒上，投資者可以留意A中滙豐購（16396）今年七月十九日到期，行使價12.38元，實際槓桿約8倍，引伸波幅則約29%。
Handsome哥