市場熱線：康師傅買定等開車

好多嘢的確唔係幾明，大戶既然要挾高個市，但何故要賣甩大笨象，睇番大行報告對隻象係譭譽參半，明明係賺得多過佢哋預期，又話令人失望，豈非自打嘴巴？隻股尋日已較低位跌少1蚊，但收市仍要微跌，其他大隻佬撐到行，金錢龜（00011）業績後急升逾5%。

道指隔晚靠樓市數據改善而止跌回升，但道指依然喺萬三點窒步，今日又話睇住歐央行公布第二輪長期再融資操作（LTRO）嘅申請結果，由3,000億到6,000億歐元都有人估，孖屐一時樂觀、一時悲觀，所以幾難預測反應，但古勝定下嘅20,900點止賺位屬於安全水平。

限售政策未鬆手

滬綜指雖然只係升少少，但已係8連升，魚缸對下個禮拜嘅兩會會議有幾大期望，兩會只係諮詢同提意見性質，但之前嘅消息發布先有料到。古勝一直話A股落後，呢排祖國證監會亦好落力，出埋口話藍籌股抵買，叫人做「價值投資」。講到價值投資，自不然第一個諗起「股神」巴菲特，但祖國同胞搵快錢急功近利本性難移，早搵夠早上岸早享受。至於巴菲特亦唔係次次眼光咁準，唱好花旗樓市咁耐都未有大起色，早幾年用20億美元買咗間天然氣期貨公司隨時渣都冇。

上海突然畀阿爺叫停外地人住滿3年可買第二套房政策，經過5日至叫停，證明阿爺今次已經考慮再三，今日內房股會有調整。不過，阿爺想樓價跌啫，唔係想樓市死，既然發展商呢排肯減價，阿爺亦樂得見「價跌量升」，近兩三個禮拜內地樓市學香港有小陽春。

尋日炒得最勁係紙股，原因係最壞時候已成過去，兩大食品股亦一大棍上升，尤其康師傅（00322）喺21.9元個位頂咗幾日之後，呢兩日開始反攻。老實講，食品股舊年成績表打定輸數，但下個月派完成績表之後可以重新計數，原因亦講過好多次，舊年衰在原材料價格上升但產品限制加價，搞到毛利率下跌，不過收入增長仍然強勁，如果毛利率能夠回復正常嘅話，未來盈利增長有數得計。

收購業務好事近

康師傅未來亦要睇住收購百事可樂中國業務之後嘅表現，唔少人唔睇好呢單姻緣，皆因汽水市場日漸萎縮，依家嘅人愈有錢愈重視健康。雖然萎縮已係趨勢，但速度其實好慢，康師傅係第一批打入神州市場嘅外資企業，對於內地市場好有經驗，所以將百事中國扭虧為盈並唔出奇。

傳聞康師傅同百事嘅婚期喺下個月，完婚後將超越可口可樂成為飲料界一哥，市佔率接近兩成，而好多資源亦可以整合，康師傅今年有望重返25蚊樓上。

古勝