孖妹缸湖遊：滙恒告白與財策啟示

黃：敦沛證券副總裁黃志陽

植：耀才證券市場研究部副經理植耀輝

敦沛證券副總裁 黃志陽

耀才證券市場研究部副經理 植耀輝

祺祺： 滙豐嘅廣告口號陪伴住港人成長，猶記得八十年代初嘅「儲蓄在滙豐　滿足在心中」，當時媽媽都係帶我去滙豐開設第一個儲蓄戶口架！

放大圖片	你如何看滙控即將公布的業績？

　黃： 哦，嗰時你好細個咋喎！我就對八七年推出嘅「今日滙豐 助您成功」最印象深刻啦，因為當時香港經濟啱啱起飛，市民都憧憬發達成功，滙控股票更係一時佳話，買到滙控就好似攞住「成功」嘅鑰匙！不過，滙豐依家嗰句「環球金融 地方智慧」亦係佳作，須知道世界各地嘅文化習慣有異，若要發展環球業務，便要運用「地方智慧」配合當地文化，先可以成功。

高妹： 但歐美經濟下滑，拖累滙控嘅表現。獅王仲可唔可以喺世界舞台發威？

　植： 滙控一直提倡「環球金融」，不斷東征西討擴展業務，成績有目共睹。但經美國次按一役後，過去兩年嘅業績大不如前。滙控今日公布業績，市場估計約有兩至三成的盈利增長。獅王素來以美國、歐洲同香港作為業務發展重心，但美國經濟仍未復甦過來，歐洲又受到債務危機衝擊，香港亦缺乏增長動力，所以滙控近年轉戰新興市場，謀求盈利增長機會。然而，新興市場嘅發展潛力雖大，但競爭亦相當激烈，好似內地以中資銀行為重，故獅王嘅業務發展或會遇到樽頸。

滙控上半年睇84蚊

祺祺： 唉，滙控盈利能力難復當年勇，咁我哋揸住隻五號仔咪危危乎！

　黃： 咁你又唔使驚，我老婆都有揸住隻五號仔啦！佢由○二年買到依家，一路走來可謂甘苦與共，好彩滙控對散戶從來不薄，年年都會派息，依家可算係財「息」兼收！

高妹： 唉，我哋喺百幾蚊高位入市，依家只能慨嘆「花無百日紅」！

　黃： 其實滙控已經整合緊業務，以增加資本實力同聚焦於增長潛力較佳嘅新興市場，另歐智華自出任行政總裁後，便重新訂立發展策略，其決策能力亦可給予投資者信心。縱使滙控股價喺過去兩年都在公布業績後下挫，但散戶今年可以等埋張成績表，到時股價應可上升到78蚊，而今年上半年嘅目標價可以定喺84元。

祺祺： 哦，咁句「環球金融　地方智慧」咪已經不合時宜！

　黃： 我建議可轉成「卓越資本　滙聚歐亞」。滙控嘅資本充足率超過10%，雄厚嘅資本實力係銀行嘅發展優勢。至於未來發展方向，放眼亞洲係毋庸置疑，另歐洲雖受債務問題所困，但當地政府推出量化寬鬆政策，將不斷泵錢畀銀行，可為滙控帶來機遇。

　植： 或者改成「金融中堅　以你為先」都不錯！中堅代表屹立不倒嘅形象，既進可攻，亦退可守。儘管滙控盈利能力已大不如前，但仍係本地銀行界一哥；此外，滙控近年傷咗唔少港人個「心」，裁員潮更令人失望，所以口號講明「以你為先」，可着重客戶服務，以挽回人心。

恒生股價夠「穩健」

高妹： 哈哈，你哋個主意的確不錯，等我哋下次提議畀滙控嘅公關朋友先！咁恒生嘅口號又有乜提議呀！

　黃： 恒生係本地薑，專注發展本地業務並以「穩健」作招徠，唔似滙控咁積極拓展環球業務。不過，我對恒生嘅廣告口號的確無滙控咁深刻，只係稍為記得「理財創富　專注為你」。恒生口號或者可改成為「恒生 穩固創新」，既以「穩」為重，亦需謀求一些突破。

祺祺： 話時話，恒生都係今日公布業績喎，唔知成績會點呢！

　植： 恒生一向穩打穩紮，業務增長應可維持上年水平，估計派息水平可一如既往，股價亦會平穩發展，年內目標價為117元。由於本地業務已接近飽和，恒生近年銳意進軍內地，持股12.8%嘅興業銀行更係盈利增長點。雖然恒生股價上落唔大，但派息一向穩定，故仍吸引散戶買入作收息之用，就像「持之以恒　生財有財」。

高妹： 果然係佳句！咁買滙控好，定買恒生好呀？

　黃： 無疑恒生係穩健之選，但欠缺升值潛力。相對之下，我認為滙控較可取，因滙控由高位跌落嚟，可博反彈機會，加上集團謀求轉型以重拾昔日光輝，可望成為收息增長股。

你如何看滙控即將公布的業績？

滙控（00005）今日公布去年度業績，大行的看法普遍較為審慎。你如何看滙控即將公布的業績？據今期《東方產經》網上民調，截至上周末晚上六時的結果顯示，55.1%表示「好過預期」，20.3%表示「差過預期」，24.6%表示「平平無奇」。

（高妹）、（祺祺）

若有料報畀高妹同祺祺或有嘢問，可電郵money.biz@opg.com.hk