上周亞洲區股市氣氛唔錯，偏偏港股唔升唔跌唔知想點，成交轉靜，與交投轉趨活躍的A股形成強烈對比。若然本周期指結算後仍未有明確方向，唔排除三月政治市更加之難玩！
太陽能股沽壓未消，炒家轉戰其他板塊，消息指內地又再現沙士個案，資金流入醫藥股，國藥（01099）、神威藥業（02877）股價均高收。
此外，電訊設備股亦見鑊氣，繼上周提及的京信通信（02342）起動後，中國無線（02369）亦有炒味，上周五股價曾高見1.73元，最後收報1.65元，升2.4%。既然板塊聚到人氣，同類股晨訊科技（02000）上周五曾高見0.74元，收報0.72元，升7.46%，短線企穩50日線0.7元的話，相信炒作未完，短炒目標睇0.8元關，穿0.67元止蝕。