市場熱線：瑞年最啱炒落後

港股連升七個禮拜之後，上個禮拜卒之斷纜，但至今其實冇乜調整過，最多係回落兩、三百點，連震倉都慳番，今次大戶對待散戶實在太好。從來魚缸都係升快跌慢，舊年十月挾升4,000點喺單月完成，但今次升足兩個幾月，大把時間畀你買貨。不過，之前港股傍住A股跟升唔跟跌，上周五滬深300指數升1.6%，但恒指只係微升25點，國指更係連續兩日下跌，有啲轉弱訊號。

內房股隨時反彈

道指連日企唔穩喺萬三點，但標指則重上海嘯前高位，呢排「豬20」開會亦冇乜人理，孖屐依家最驚油魔影響經濟，向上炒藉口係放水，向下炒原因會係實體經濟衰退。

港股放榜期亦係向上、向下炒都得，但業績股呢排表現都唔差，例如聯想（00992）、思捷（00330）、友邦（01299）等，前兩隻更係破咗派成績表後例跌嘅往績，大笨象如果成績表冇乜令人跌眼鏡嘅話，以一隻PE唔夠10倍、息率有4厘幾嘅股票，絕對有能力領軍向上。

上海上個禮拜出咗個「舊政新繹」，之前有省市想為樓市鬆綁，不出一、兩日就被阿爺叫停，但上海至今大步檻過，喺阿爺「默許」之下，相信唔少省市會繼續試水溫，祖國樓市亦出現小陽春，內房股有機會受刺激再升。

今次升浪算係少公司乘機抽水，中航科工（02357）上周五停牌批新股，反應聽講幾熱烈，隻股一向有注資憧憬，所以唔似得銀基（00886）大股東cap水咁大劑。

呢排炒落後股好過炒市，好似醫藥股喺醫保加碼公布之後遲咗一日至升，畀埋時間你買貨。而隻保健品股瑞年（02010）唔知點解長期低沉，舊年上半年成績表仍可多賺45%，下個月嘅全年業績照計唔錯，一一年PE得5倍幾，平盡內需界。

業務勝在多元化

有人擔心祖國咁多食品安全問題，所以瑞年亦算高風險類別，但保健品發現問題嘅機率較低，而瑞年亦將業務多元化，除咗推出愈來愈多新產品之外，仲出埋涼茶，今年仲喺南通市搞咗間健康體檢服務中心，提供健康講座、諮詢同體檢等項目，由「製造」業推展到「服務」業。不過，揀瑞年主要係睇中佢落後，上周五連霸王（01338）、雅天妮（00789）都升埋，瑞年淨係炒PE同落後兩瓣，短線已夠殺，至於中長線就睇埋全年成績表至講。