龍年開波到依家，好似承接咗《龍珠》主角──孫悟空嘅龜波氣功一樣，為股海成風起浪。加上阿爺嘅無盡的愛（即係又放水）領導大家一齊打爆歐債危機，為市場注入無盡動力，繼續挾囉。星期日睇本報，話蒲台島會向陰宅市場全力進發，呢期真係「陽宅又缺宅男女，陰宅又缺宅男女」，似乎我哋嘅人生全面大計又要更加精心計劃，如果連累家人就麻煩啦！
如果冇記錯，Prof. J喺較早講墓園股，全因都係一個最基礎嘅概念，需求同供應。係人都知香港地產商全力發展陽宅，但陰宅市場之大亦都不能忽視。
Prof. J搵到個數據，就係另類房地產呢個行業過去五年以複式增長超過3倍，仲有如果加上人仔升值，一來一回，都係一個非常好計數嘅回報。加上近年呢個市場為咗走向專業，亦都開始加入監管同追蹤嘅元素，令市場透明度一步步做好，對各位就更加有利。
要揀另類地產股──仁智國際（08082）係我首選，全因佢哋請咗一位大人物來活化成個項目。呢個代理人曾為英國若干上市及非上市公司之主席，亦都係Dignity（一間FISE250公司同英國殯儀相關服務最大供應商）主席，似乎佢要將概念本土化，以打造一個全新嘅管理及服務公司（MSC），雄心壯志，繼續追蹤出發。
香港大學電子金融服務榮譽助理教授徐燦傑