絲絲講場：梁高美懿打高球點只有姿勢
「日日運動有益身心」呢句話連小朋友都識，但係班賓卡（banker）平日咁忙，一日坐足十幾個鐘，要好有恒心，至「擠出」少少時間做吓運動。有見及此，恒生銀行（00011）早前首次舉辦咗個高爾夫球體驗日，等班賓卡可以忙裏偷閒兼舒展吓啲筋骨。
當日有100位員工參加，副董事長兼行政總裁梁高美懿更加以一身「Pink lady」look出席，連球桿都係粉紅色。唔好以為伊人得個樣，查實有姿勢兼有實際，絲絲見佢紮好馬，打出又遠又直嘅第一桿。
策略多變 講求專注
原來梁太一向都有打開高球，佢認為呢樣運動千變萬化，要因應球道同環境，採取唔同嘅策略，仲要講求專注，所以佢鍾意透過打高球嚟減吓壓，兼且可以鍛煉身體、訓練頭腦同耐性喎。
絲絲喺活動當日體驗咗9洞打球，同上咗個小組教練指導課程，真係獲益良多。恒生好注重員工嘅健康，除咗高球，佢仲有舉辦保齡球、羽毛球、乒乓球、籃球同足球等活動，喺二○一一年參加人數仲超過20,000人次添！