絲絲講場：信誠劉老闆話畀冧巴要有膊頭

率先推iBond認購優惠

就好似近日信誠舉行春茗聯歡晚會，一向極少講股票冧巴嘅劉老闆，就為賓客們建議咗一個「穩賺」嘅投資，佢仲講笑話「做男人要有膊頭」，承擔得起先敢推介，掀起全場高潮。

劉老闆對乜嘢冧巴咁有信心？咪就係iBond（04208）！老闆話，上一批iBond派息連價格升幅已經有約一成回報，預期嚟緊第二批市場認購反應將非常熱烈，所以佢哋間寶號已經由尋日起，率先推出認購iBond優惠，係100%借貸、零利息同零按金，聽落幾吸引，新舊客戶都可以即日起優先預訂。

講番春茗盛會，當晚筵開50多席，場面熱鬧，加上信誠員工與客戶落力參與歌唱、魔術表演，又有抽獎、估股市升跌等遊戲，整晚氣氛一直高漲，賓客亦滿載而歸。