產品相似好難突圍
老友話，中央對RQFII嘅八成債券、兩成證券規定鎖得太死，無辦法自訂特色吸引客人，講真，啲客隨便撞入間中資銀行，話做個人民幣定存，閒閒地都有兩、三厘息啦，仲唔使畀基金費，咁點搵人認購呀？
其實絲絲二月頭已經聽聞有幾間中資行，為咗要喺限期前達標，惟有向員工埋手，凡係經理級以上，包括大sales員工，都要孭quota，孭數由10萬蚊人仔起，咁即係揼佢哋心口啦，有幾個sales嬲到揚言話要去勞工處投訴。據聞呢班慶合合嘅夥計，啲火最近就畀中環連串嘅裁員減薪消息淋熄咗，未有聽到邊位真係做咗勇士。