受到內地宏調打擊，內地房地產市場冇辦法唔低迷，有發展商就乘機炒底，除咗睇吓有咩平地買吓之外，仲傳出要炒人添。內房老大之一嘅恒大（03333）就用行動證明佢哋冇炒人，反要「面向全球」請5,300人。
絲絲聽老友講，依家恒大員工數目已經超過32,000人，而且每年都會有一定規模嘅增長，平均每年加大概2,200人左右，今次恒大要請成五千幾人，等於人手加幅達16.5%，都咪話唔厲害！
聽講今次仲打破咗歷年招聘嘅最高紀錄。絲絲老友話，今次佢哋公司請嘅全部都係中高層嘅人才，其中總建築師、總工程師、會計師呢啲專業位置嘅就佔5,000個，而另外300個就包括集團副總裁、地區公司董事長呢啲管理階層嘅位，不特止，要請中高層，銀彈當然唔少得，據講，恒大舊年業績表現好嘅地區公司董事可以拎到成2,500萬人仔嘅人工，而有啲經理級別都可以有成百萬人仔年薪。
老友同絲絲講，佢哋招聘會嚟緊喺三月三、四日喺廣州恒大總部舉行，雖然依家內地房地產市場的確唔係太好，不過就正因為咁，先會有大量中小房企人才流失，所以要利用呢個機會炒底人才咁話喎！