港交所（00388）主席夏佳理四月就會結束六年嘅主席生涯，邊個會接任佢個主席位，成為坊間另一場「估領袖」遊戲，唔少人都認為史美倫（查太）係頂頭大熱。
咁又係，查太依家係港交所非執行董事，又做過中、港證監會，同內地關係又不俗，江湖地位夠晒，喺港交所「更上一層樓」好似好順理成章咁。
有中環線人同絲絲講，有好多人游說查太做呢個位，亦估計查太對呢個位都幾有興趣，而且到現時為止，都暫時未聽到話有其他人有興趣做主席呢個位，所以查太呼聲甚高！
不過，查太接任做港交所主席，亦唔係暢通無阻o架。事關，佢係港交所政府委任董事，到今年，六年任期已屆滿，政府一向有不成文規定，委任公職人員任期唔超過六年。查太若要成為港交所主席，政府有必要解釋點解打破委任不逾六年嘅慣例。
但心水清朋友應發現，政府委任公職人員不超過六年，其實只係一項指引，過去亦試過有唔少例子，打破「任期六年」嘅指引，好似醫管局主席胡定旭，喺○四年做主席，喺二○一○年任期已經夠六年，之後獲政府再委任多做兩年，任期至今年底。
所以話，查太係有機會o架，不過，最終結果係點，大家等多兩個月，就會揭盅！