市場熱線：昆能長線揸得過

大隻佬業績成焦點

尋日全世界主要魚缸都升，美股雖然冇市但期指亦升，亞洲魚缸淨得香港跌，所以港股倒跌處境不妙，但古勝提出二月六號做參考，係想話大戶兵不厭詐，可能學上次咁整固幾日後又再殺上，在下維持止賺位喺20,900點，同大戶鬥錢鬥智都輸硬，惟有嚴守紀律。

放大圖片

圖：東方產經

尋日轉升為跌好容易解釋為趁好消息出貨，下次再減存備率（RRR）相信要等三幾個月，亦恐防希臘筆預期到手嘅救濟金臨門撻Q。恒指尋日高見21,760點，啱啱回補番舊年八月嘅下跌裂口，呢個其實唔算乜嘢重大阻力位，只係好多人心中嘅目標價，亦係唔少熊仔嘅密集區，陰謀論早就覺得點都要「到價」。

滬綜指雖仍升6點，但差唔多係全日最低位收市。減RRR效應連直接受惠嘅內銀股都企唔穩，交通銀行（03328）同招行（03968）仲要倒跌，內房亦升幅大為收窄，但最估唔到係石油股，伊朗禁運石油去英法刺激油價衝上每桶105蚊美金，但原本強勢嘅中石化（00386）竟然大跌5.45%。

三大內地電訊商相繼公布一月上客數據，全部3G上客人數都明顯少過舊年十二月，數據幾令人失望。依家中港地主股已升得差唔多，電訊股、石油股同內銀股又好似冇乜力，港股有冇得再升要睇住大笨象（00005）同保險股，月尾大笨象業績係頭關。

燃氣業務勝在穩定

嚟緊要回歸基本面，睇放榜期有乜反應，尋日三隻業績股淨得光國（00257）有得升，安踏（02020）成績表差過預期，PE唔夠10倍，但訂貨會定單已見倒退。

個市又出現十字路口，可以將資金停泊喺抗跌力較強又有長線升值嘅股身上，所講嘅係昆侖能源（00135），舊年尾卒之成功收購北京燃氣之後，衝到上12至13元之間又要進行一輪整固，下個升浪不知在何時？但閣下若冇乜短炒心水嘅話，買昆能守住先亦冇壞。

收購北京燃氣係昆能嘅分水嶺，因為今年來自燃氣嘅收益可能會首次高過石油，由於佢嘅油田多數喺外國，所以阿爺減暴利稅對佢幫助唔大，但高油價始終佢係得益者。

做燃氣業務一向平平穩穩，但北控（00392）唔經唔覺再創49.05元嘅52周新高，昆能同北控所持北京燃氣股權係6：4之比，既然北控咁強勢，昆能做「襯家」亦應受提攜，而佢阿媽中石油（00857）更係架勢，長遠發展可望有優勢。

其實昆能一路都有擴充佢嘅燃氣業務，但祖國咁多大小城市，要擴充只能逐個逐個去做，做長線投資就最啱。

古勝